Auðvitað klárar Sturla málið!

Umræðan um tvöföldun Suðurlands- og Vesturlandsveg er nú á svipuðum stað og umræðan um Reykjanesbrautina stóð sem hæðst árið 2000-2001. Og hver var niðurstaðan þar hjá núverandi stjórnvöldum  - jú tvöfalda Reykjanesbrautina. Í dag eru þrjú ár liðin á brautinni án þess að banaslys hafi orðið - Já 3 ár en 3 ár þar á undan létust 18 einstaklingar á sama tímabili. Og afhverju ættu þessir sömu stjórnarliðar ekki að halda áfram góðu verki - ég bara spyr.

Sem formaður áhugahóps um tvöfalda Reykjanesbraut veit ég af eigin reynslu að verkefni sem tvöföldun vega tekur tíma en það þarf að byrja og ná niður slysatölum á Suðurlands- og Vesturlandsvegi eins og gert var með Reykjanesbrautina. Ég treysti að ákvörðun dagsins marki þá ákvörðun og verkið hefjist sem allra fyrst. Því mun ég og mitt fólk fylgja eftir.

Í samtökum Samstöðu höfum við barist fyrir bættu umferðaröryggi á landinu öllu með því að virkja nýja áhugahópa um allt land, með miklum áróðri í fjölmiðlum og jákvæðri umræðu um þá vakningu sem nú á sér stað í umferðareftirliti á landinu. Og hver er staðan á 100 degi ársins - jú banaslys voru fimm sinnum algengari að meðaltali á síðasta ári en það sem af eru þessu ári, fimm sinnum algengari.  Í ár hafa því miður 2 einstaklingar látist í umferðinni (þar á meðal einn á Suðurlandsvegi) eða með 50 daga millibili. Á síðast ári lést einstaklingur með 11 daga millibili allt árið. En hvert banaslys er einum of mikið og því verðum við áfram að berjast með slysalausa sýn að markmiði. Við skulum vona að árið 2007 verði betra ár í umferðinni en við höfum upplifað síðustu tugi ára. Það getur orðið það ef við höldum baráttu okkar og samstöðu áfram.

Við vorum öll minnt á fórnarkostnað Suðurlandsvegar þegar Hannes Kristmundsson vinur minn stóð fyrir því að 52 krossar voru settir upp í samvinnu með Samstöðu, Vinum Hellisheiðar og öðrum áhugamönnum um bætta umferðarmenningu. Höldum góðu verki áfram og klárum málið.

 

 

 

Útboð á tvöföldun Suðurlandsvegar og Vesturlandsvegar undirbúið

Athugasemdir

[Egill Jóhannsson, 12.4.2007 kl. 00:04]

Ég er sammála þér en í samræmi við blogg sem ég skrifaði 24. febr. og annað blogg aðeins fyrr þá átta ég mig ekki á þeirri forgangsröðun að breikka Vesturlandsveg frá Mosfellsbæ upp að Kollafirði. Sú breikkun er óþarfi á þessu stigi að því gefnu að fjármagnið sem sparast fari í að flýta Sundabraut því hún mun draga úr umferðarálagi í gegnum Mosfellsbæ.